考試資訊
考試日期
2024 年 4 月 11 日（星期四）
考試時間
【卷一－閱讀能力】08:30 A.M. – 10:00 A.M.
【卷二－寫作能力】10:45 A.M. – 01:00 P.M.
考試嗰陣要帶啲咩？
× 原子筆（記得檢查有冇墨，帶自己用慣嘅就 OK！）
× 塗改帶
× 螢光筆
× 鉛筆
× 擦膠
唔使帶太多文具，枱嘅空間唔大，太多文具反而會影響翻閱試卷嘅速度！
× 如有需要，可以帶錶！
卷一－閱讀能力
概覽
甲部：指定閱讀篇章（佔全卷 30%）
乙部：閱讀能力考材（佔全卷 70%）
兩個部分嘅作答要求同分數比例不一，請按個人目標同策略做好時間分配，切勿過份留戀某一個部分，完成全卷先係終極目標！
不論係甲部定乙部，睇清楚題目要求先好作答！
× 究竟問題分幾多個部分？
× 佢喺度問啲乜嘢？
× 係單純喺文中搵答案就得，定抑或需要延伸解釋？
唔好心急！可以圈咗關鍵字出嚟先！答得準先係攞分關鍵！
甲部：指定閱讀篇章
建議唔好過分信任 tip 題攻略。喺能力同埋時間許可下，希望大家能夠盡可能溫習每一篇範文，然後再挑選某啲內容進行更細緻嘅背誦、溫習同分析，做足準備再去考試係會安心啲嘅！
乙部：閱讀能力考材
閱讀理解部分，不論白話文抑或文言文都可以嘗試做咗預讀先，即係睇吓文章嘅標題同作者，咁樣可以對文章內容有初步嘅了解同判斷，對搵答案有幫助㗎！
以練習卷為例，文章標題叫《認識一個十八歲的人》，咁你就可以由此推測文章係同親情有關！
白話文閱讀部分
可以先初步睇睇屬於議論／記敘抒情／夾敘夾議等乜嘢類型。
例如：如果係以描寫死物為中心嘅話，除咗要留意描寫內容同手法之外，可以一邊讀嘅時候一邊諗死物背後嘅象徵意義以及作者嘅感悟。
簡單嚟講，你要有意識咁記住文章至少分兩個層次，嘗試透過表象睇裏面。
文言文閱讀部分
近年考評局鍾意考文言同中文文法知識，所以你可以喺開考前睇吓基礎嘅文言知識，例如文言被動句同埋使動用句等！
總結
睇清楚題目有冇「引原文作答」抑或「以原文輔助說明」等關鍵字眼，咁樣代表你需要直接運用文章內容！
總括嚟講，做好時間同分數分配，唔好留戀某一條題目，亦唔好追求單一問題要完美回答。「及時抽身」係致勝之道之一！
卷二－寫作能力
概覽
甲部：實用寫作（佔全卷 30%）
乙部：命題寫作（佔全卷 70%）
2024 DSE 中文科卷二改咗考核模式，將會分為兩個部分，故卷二其中一個需要注意嘅地方係 時間管理，一旦時間分配失衡，就會影響下一個部分嘅寫作！
甲部：實用寫作
建議喺落筆之前睇清楚寫作背景，包括：
× 寫作對象
× 身分
× 應用場合
× 題材 等等。
呢啲寫作背景都會直接影響實用文嘅 行文語氣、表達方式、格式 等等。
評分項目
－ 內容（滿分 30 分）
－ 行文語氣（滿分 10 分）
－ 組織（滿分 10 分）
甲部設有字數限制。如果超出限制，「內容」最高品第亦會因而調節：
超出不多於 100 字 ：「中上品」 最高 24 分
超出 101 – 150 字 ：「中中品」 最高 18 分
超出 151 – 200 字 ：「中下品」 最高 12 分
超出 200 字以上 ：「下品」 最高 6 分
因此記得要控制每一段嘅篇幅！
記得要用合適嘅資料嚟進行說明同拓展！
考核文類包括 書信、評論、建議書、演講辭、報告、專題文章。
如果格式有錯漏或添加多嘅餘格式，「組織」會按以下原則扣減分數：
小疵：扣減 1 分
較大或較多錯漏：降一品 （扣減 2 分）
乙部：命題寫作
建議落筆之前用 5 – 10 分鐘寫一寫大綱，呢個絕對係一項值得嘅投資！
大綱可以：
✅ 令自己更清晰寫作要求
✅ 避免內容離題
✅ 避免一邊諗一邊寫發現寫唔落去嘅情況
不論係揀邊一條題目，記得睇清楚題目關鍵字，唔好放過任何一個字眼。
不論係邊一款題目類型，扣題係重中之重，切勿離題！
而喺扣題之上，如果想有更理想嘅成績，記得寫自己嘅感悟同反思！
唔好過分追求華麗嘅字詞和句子組合，其實只要行文表達流暢，文法正確已經好好！
注意標點符號運用，喺適當嘅位置請加上「。」！
如果可以嘅話，字體寫清晰啲冇壞，至少可以攞到評卷員嘅「印象分」！
