試前 Checklist
准考證正本
考評局並唔接納准考證副本！
身分證正本
如果你咁啱呢排換身份證，你可以帶其他有相嘅身份證明文件，例如附有相片的申請香港永久性居民身分證收據、回港證、護照！
警署所簽發嘅報失紙（Loss Memo）唔可以用作身分證明文件！
電話
記得預先下載「報到易 Check-in Smart」應用程式！（可以睇返之前嘅 Post！）
千祈唔好喺試場內影相／錄影／錄音！
八達通
檢查入面有無足夠餘額，無就記得增值！
現金
記得銀包要有足夠數量現金，必要時可以用嚟搭的士！
文具
黑色／藍色原子筆（帶多幾支，每支都睇吓有冇墨／會唔會斷墨）
塗改帶（帶 2 至 3 個）
鉛筆（刨定 3 至 4 支 HB 鉛筆；選修視覺藝術、設計與應用科技、科技與生活嘅朋友就記得按需要帶埋其他硬度嘅鉛筆！）
擦膠
螢光筆
※ 選修視覺藝術、設計與應用科技、地理、科技與生活、以及倫理與宗教（基督宗教）嘅朋友記得按需要帶埋其他文具／考試用品！
※ 筆盒／筆袋放喺袋入面或凳底下都得！
計算機
檢查清楚計算機上面冇寫上任何內容或記號，如果有貼紙嘅就記得搣咗佢！
計算機機蓋記得要放喺凳底！
筆記
電子、紙本筆記都得，可以喺臨開考之前喺試場出面睇！
如果係電子器材嘅話，考試開始前記得熄機，然後放入袋！
普通手錶
指針錶／數碼錶皆可，但記得熄咗所有響鬧功能佢！
唔可以戴裝有流動應用程式或支援無線技術嘅手錶（如 Apple Watch）！
只具備健康檢查功能嘅智能手錶亦唔可以使用！
水
水樽唔可以放喺枱面！一定要放喺座椅下！
根據考評局，如果你想喺試場內喝水，你需要先獲得監考員嘅許可，然後喺監考員監督下喺禮堂內喝水！
乾糧
根據考評局，你係唔可以喺試場內飲食。如果你肚餓嘅話，你可以喺試場外嘅地方食少少乾糧！
雨遮
呢排都有機會會落雨，放定把縮骨遮落袋就最安全！
外套
有啲試場有機會好凍，記得帶外套！
紙巾
除咗用嚟擤鼻涕，遇到唔平嘅枱／凳嘅時候仲可以墊枱／凳腳！
收音機、耳筒
記得要係符合規定嘅收音機同耳筒，收音機最好換個新電池，充電式嘅就確認吓係咪已經叉飽電！（可以睇返之前嘅 Post！）
口罩、酒精
今年考試並無強制戴口罩，你可以按需要自行決定係咪戴！
啱啱換身分證／唔見咗身分證點算？
除咗身份證之外，以下嘅文件／證件都可以用作身份證明文件：
– 申請香港永久性居民身分證收據
– 香港特別行政區護照
– 回港證
不過，警署所簽發嘅報失紙 (Loss Memo) 唔能夠當作身分證明文件使用！
「報到易」常見問題
係唔係試場主任宣布咗先可以用「報到易」簽到？
唔係，你一入到試場就已經可以用「報到易」掃描自己嘅電腦條碼貼紙，完成簽到程序。
遲到仲使唔使用「報到易」？
唔使，到時你直接熄電話，放電話落凳底，然後坐低就得。放心，唔會扣分，亦唔使寫報告書！
係唔係每一節考試都要用「報到易」重新簽到？
係！考完卷一，考卷二要再重新簽到！
係唔係每一科都要用「報到易」簽到？
係！所有主科（包括英文聆聽）同選修科都要用「報到易」簽到！
SEN 考生使唔使用「報到易」？
唔使！特別試場唔設第二代公開考試支援系統，監考員會幫你完成點名程序！
試場常見問題
枱面係咪一定要放准考證正本同身份證明文件正本？
係，不論你有冇用「報到易」簽到，你都係一定要將准考證正本同身份證明文件正本放喺枱面！
試場入面可唔可以飲食？
試場入面唔可以食嘢。如果你想喝水，你需要先得到監考員嘅許可，然後喺監考員監督下喺禮堂內喝水。
水樽同筆袋可唔可以放喺枱上面？
唔可以！一定要放喺凳底！喺筆袋拎文具之前須要舉手向監考員示意！
未開考之前可唔可以喺試場入面傾計？
你唔可以傾計或者對人打手勢，否則會被扣分！
未開考之前可唔可以喺試場入面睇 Notes？
根據《考生應考須知》，入咗試場之後，你唔可以再翻閱任何同嗰科有關嘅資料，否則會被扣分！
可唔可以去洗手間？
可以，舉手同監考員講就得，到時會有監考員陪你去。 不過，如果你去咗洗手間，你唔會獲補時間作答。所以最好入試場之前去定洗手間，同埋唔好飲太多嘢！
可唔可以早退？
除咗數學必修部分卷二、經濟卷一、英國語文卷三、音樂卷一甲及卷一乙，其他科目你可以喺指定時間內同埋經監考員允許後離開試場。
如果你選擇早退，你唔可以將試卷或任何由考評局提供的物品帶離試場！
可唔可以唔戴口罩？
可以，今年並無強制戴口罩。
咩卷可以向監考員索取草稿紙？
每一科都可以向監考員索取草稿紙。
咩卷別可以向監考員索取方格紙？
數學必修部分卷一及卷二 數學延伸部分單元一及單元二 物理卷一及卷二 生物卷一 地理卷一及卷二 設計與應用科技卷二
漏貼電腦條碼貼紙會唔會扣分？
一般而言，喺內頁答題簿漏貼電腦條碼貼紙唔會影響分數。 只要你有喺封面頁貼上電腦條碼貼紙，一律都唔會扣分！ ※ 封面頁嘅電腦條碼貼紙一定唔會漏貼，因為收卷嘅時候監考員見到嘅話，佢一定會叫你喺佢監督下補貼返！
計算機常見問題
係咪科科都可以用計算機？
除咗中國語文科同英國語文科，其餘所有科目都可以用計算機！
▌▌▌▌█ H.K.E.A.A. APPROVED 標籤甩色可唔可以用？會唔會扣分？
可以用，唔會扣分，唔使寫報告書。
計算機上面可唔可以有貼紙？
正面定背面、有字定無字嘅貼紙都唔可以。 如果你有多過一部計算機，你可以用箱頭筆喺其中一部計算機上面畫粒點，以此區別出「邊部打邊部」 。
香港考試及評核局電話
