咩係「報到易」?
「報到易」係考評局第二代公開考試支援系統嘅手機應用程式，用嚟俾大家喺試場內進行自行簽到，以簡化點名流程，提升考務工作嘅效率。
點樣下載「報到易」?
喺 App Store ／ Google Play 搜尋「報到易」或者「Check-in Smart 」即可下載！
如果你喺較早前已經下載咗「報到易」應用程式，記得去 App Store / Google Play 檢查吓程式係咪已經更新到最新版本！
至於「監考易」係俾考務人員使用嘅應用程式，考生毋須下載！
點樣登入「報到易」?
1️⃣ 按「登入」，閱讀完「使用條款及細則」之後按「同意」
2️⃣ 用「考生編號」或「身份證明文件號碼」登入，輸入翻您報考 DSE 嗰陣時提供嘅電郵地址同埋出生日期
3️⃣ 檢查電子郵箱，查閱附有「一次性密碼」嘅電郵，然後喺「報到易」打翻電郵入面嘅「一次性密碼」
幾時簽到？點樣簽到？
簽到功能會喺每節考試前一小時啟動。
試場主任會喺開考前 15 至 20 分鐘安排考生進入試場，到時大家就可以使用「報到易」，掃描獲發嘅個人電腦條碼紙上任何一個 Barcode就可以完成簽到！
「報到易」簽到詳細步驟
1️⃣ 入到考場之後點擊嗰場考試下方嘅「簽到」按鈕，之後允許應用程式使用相機功能
2️⃣ 掃描由監考員派發嘅個人電腦條碼紙，完成簽到後，版面會顯示「簽到已完成」嘅訊息
3️⃣ 完成簽到後依照試場主任指示關閉手提電話，並將電話放在凳下當眼處，等監考員清晰看見
請緊記：你需要喺「檢查個人物品」宣布完畢前完成簽到！
常見問題
喺特別試場（SEN 試場）應考嘅考生需唔需要使用「報到易」？
特別試場不設「第二代公開考試支援系統」 (PESS2) ， 因此喺特別試場應考嘅考生毋須使用「報到易」！
簽到完使唔使開住電話？
完成簽到後，應用程式會自動顯示「簽到已完成」以及簽到時間嘅版面。
如果你見到呢個畫面，請立即關閉手提電話，並將電話放喺座椅下嘅當眼處！
用唔到「報到易」，或者當日唔記得帶電話會唔會處分？
因為啲咩原因用唔到都好，你都係唔會有任何處分，唔使擔心！
監考員會喺開考後會幫你完成簽到程序！
考試當日遲到仲使唔使用「報到易」簽到？
唔使！到時請立即關閉手提電話，監考員會幫你完成簽到程序！
備註：唔建議考試遲到，記得預留足夠嘅通勤時間！
考英文科口試、體育／音樂實習考試使唔使用「報到易」？
唔使，請按照考務人員嘅指引進行報到！
溫馨提示
1️⃣ 考試當日你依然需要放准考證正本同身分證正本喺枱面，俾監考員確認身份！
2️⃣ 記得唔好將電腦條碼貼紙拍攝存檔／擷取屏幕截圖，否則會被扣分！如果以電子或公開形式展示電腦條碼貼紙，成績會被降級！
資料來源：香港考試及評核局
