點樣先知我去嘅考場使唔使帶收音機／耳筒？
聆聽考試試場嘅廣播方式分為三種：
電台廣播（准考證上無標示任何符號）
✅ 要帶收音機、✅ 要帶耳筒
紅外線接收系統（准考證上標示符號：#）
✅ 要帶收音機、❌ 唔使帶耳筒
學校播音系統（准考證上標示符號：&）
❌ 唔使帶收音機、❌ 唔使帶耳筒
※ HKDSE 應用程式並唔會顯示你去應考嘅試場嘅廣播方式！所以一定要攞准考證出嚟 check 清楚！
收音機限制及規定
1. 必須係可以收聽 FM 電台廣播嘅耳筒式收音機
2. 機身體積要喺 46 cm × 15 cm × 15 cm 以內
3. 收音機內唔可以放置儲存媒體，包括但不限於：SD 卡、光碟、錄音帶
耳筒限制及規定
1. 插頭直徑 3.5 mm
2. 備有兩個絕緣環
3. 耳筒唔可以附有揚聲器
電台廣播試場試前準備
1. 檢查收音機同耳筒係咪正常。如果收音機封塵已久，唔肯定佢會唔會用用吓失靈嘅話，最好就趁而家買返部新嘅！
2. 熟習收音機嘅操作方法，因為監考員唔會幫你手！
3. 幫收音機入新電池，同埋帶多幾粒後備電池；而如果收音機係充電式，記得喺考試前一晚要叉飽電！
4. 考完英文 Paper 1 & 2（3 月 3 日）臨走前，你可以喺自己個位測試吓收音機接收質素。萬一有啲咩問題，你都仲有時間買返部新嘅收音機／耳筒！
電台廣播試場考試流程
提升接收效果方法
選擇單聲道模式
如果你嘅收音機備有立體聲 (Stereo Mode) 同單聲道 (Mono Mode) 兩種模式，選擇單聲道模式可以獲得更佳嘅接收效果。
拉直耳筒線
由於收音機會利用耳筒引線作為天線，拉直耳筒線比起將電線捲成一嚿可以獲得更佳嘅接收效果。
電線同身體保持一定距離
移動機身嘅位置／輕微扭動耳機插頭
接收問題處理
試場主任會喺試場嘅黑板／白板上寫上校方認為嗰個試場最適宜選用嘅頻道，供各位參考。
如果多番嘗試「追台」後接收效果仍然唔理想，請盡快舉手向監考員要求前往「特別室」應試（唔會扣分！）。
小提醒：考生最好喺開考之前 CHECK 好收音機有冇接收問題，以便可以提早前往特別室。否則，如果你真係喺播緊考試錄音嘅時候先遇到接收問題，要前往特別室，你會好大機會喺搬遷期間錯過重要嘅資訊！
特別室須知
特別室會透過座枱式收音機／USB 播放器／電腦播放考試錄音，你係絕對唔可以喺特別室使用自己嘅收音機聆聽電台廣播，否則會被扣分！
紅外線廣播試場考試流程
遇到咩情況先可以／會被安排去特別室？
以下情況去特別室應考唔會扣分：
× 所帶嘅收音機／耳筒唔能夠正常運作
× 報稱未能將收音機調校到指定電台
× 報稱收音機／紅外線接收器接收不清
以下情況去特別室應考會被扣分：
× 冇帶收音機
× 唔記得或遺失耳筒／電池
× 較報到時間遲逾 30 分鐘先至抵達試場
× 收音機體積過大
× 帶收音機以外嘅電子儀器應試
學校播音系統廣播試場考試流程
資料來源：香港考試及評核局
KC Lui – HKDSE English Language Paper 3 RTHK Announcements – with Subtitles https://youtu.be/aFwSgRkx-Es/
