2025 DSE｜英文科 ORAL 應考溫馨提示｜幾時考•帶啲咩•幾點到•做啲咩•點改期•其他重要事項
考評局琴日（18 日）派發咗准考證，而第一科考試 － 英文 ORAL 將會喺 3 月 11 號開考，究竟有啲咩需要留意呢？呢個 POST 幫大家整合咗所有有關口試嘅重要資訊，希望可以幫到大家！
ORAL 幾時考？
英國語文科卷四口試將會喺 2025 年 3 月 11 日至 3 月 20 日進行 ，而特殊需要考生就會喺 3 月 22 日進行考試 。
至於考試地點、日期同埋時間就記得留意准考證／HKDSE 應用程式「我的考試日程」上面嘅資料！
貓貓小提醒：收到准考證之後，記得對翻啲資料！ × 個人資料（例：姓名、身分證號碼） × 報考科目／卷別／單元／應考語文 × 試場名稱與地址
切記：記得唔好將准考證「過膠」、塗污、寫上任何資料！
出發前：CHECK 定交通
避免因為交通問題而遲到，建議大家提前計劃好出行路線！
確認考試地點
根據准考證上嘅試場地址／考評局網站嘅試場一覽表確認地址。
安排足夠時間
考試時段處於放工時間，部分路段或會交通擠塞，到時候記得留意交通情況，預留足夠嘅通勤時間！
預先試行路線
如果真係好唔熟悉考場地點嘅話，建議你可以趁呢排根據地圖程式提供嘅交通安排親自去一次，確保考試當日唔會蕩失路！
出發前：準備好要帶嘅嘢
出發：要幾點去到試場？
你需要根據准考證上嘅指定時間向獲派試場嘅報到室主管報到。 你可以喺報到時間前 15 分鐘（即下午 4 時 45 分、5 時 45 分或 6 時 45分）進入報到室。
出發：萬一遲到點算好？
若然你真係趕唔切，遲到超過15分鐘，考評局唔會再俾你喺當日考試，你必須喺原定考試日期後嘅三個工作日內申請更改口試日期，以及需要繳交附加費。
學校 → 報到室
1. 前往報到室
學校職員會俾你喺校園內等候。去到報到時間前 15 分鐘嘅時候，考務人員會進行宣布，安排考生逐一前往報到室。
2. 關閉電子器材
進入報到室之前，確保所有電子器材（包括：手提電話、平板電腦）都已經關機。
3. 報到及核實身份
報到室嘅考務人員會檢查你嘅准考證同身份證，然後分配你到其中一個考試小組。
報到室
4. 領取考試用品
確認身份後，考務人員將會向你分發： 一張顏色 LABEL 貼紙（貼喺胸前） 兩張記分紙（一張藍色，一張粉紅色）
5. 核對記分紙資料
檢查兩張記分紙上面嘅考室編號、小組編號，以及應考次序（A／B／C／D）係咪一致。如果確認所有資料正確無誤，喺記分紙上嘅指定位置簽署。
報到室 → 備試室
1. 前往備試室
等候並根據報到室考務人員嘅指示前往備試室。
2. 就座
按照備試室考務人員嘅指示就座。
備試室
3. 備試時間開始
當監考員宣佈備試時間開始嘅時候，你可以揭開痴喺枱面上面嘅試題，並且喺 Note Card 嘅正反兩面書寫筆記。
4. 備試時間結束
十分鐘備試時間結束後，停止書寫同埋冚返起試題。
備試室 → 考室
1. 前往考室
根據備試室考務人員嘅指示，帶同 Note Card 前往考室。
2. 進入考室
將記分紙交俾主考員，並按照座位就座。
3. 放置物品
將 Note Card 放喺枱上面，並將所有個人物品（包括准考證同身份證明文件）放喺凳下。
口試試場佈置圖
口試點樣改期？
若果你事前知道／突然因急需而退出考試，你可以喺原定考試日期後嘅三個工作天內，聯絡考評局申請更改口試日期同繳交附加費。
香港考試及評核局修頓中心辦事處
地址： 香港灣仔軒尼詩道 130 號 修頓中心 12 樓 學校考試及評核部
其他重要事項
主考員或其他考生嘅性格各異，其態度或面部表情或有不同，而有關嘅差別唔能夠被視為考試異常情況或偏離既定嘅考試程序。
喺口試過程入面，考生必須專注同其他考生嘅交流。有關投訴主考員或其他考生嘅態度及面部表情而影響表現等個案將不獲處理。
考試設有既定程序，確保所有考生喺自由發言時得到均等嘅發言機會。若發現有任何考生壟斷發言，主考員會作出適當跟進，並對壟斷發言考生嘅評分作出適當嘅處理。因此，考生投訴同組其他考生壟斷、搶奪或霸佔發言機會╱主考員介入討論嘅個案將不獲處理。
資料來源：香港考試及評核局
