電腦條碼貼紙種類
每張 2 個電腦條碼貼紙
每張 5 個電腦條碼貼紙
每張 10 個電腦條碼貼紙
如果以下印喺電腦條碼貼紙上資料有誤，請立即通知監考員： × 考生編號 × 試場編號 × 座位編號 × 科目及卷別名稱
考試開始前……
入到試場之後，請使用「報到易」應用程式，掃描個人電腦條碼紙上任何一電腦條碼以完成簽到程序！
完成簽到之後，請依照試場主任嘅指示關閉手提電話。
溫馨提示
未能使用 「報到易」完成自行簽到，唔會被扣分，亦毋須填寫報告書
喺考室入面攝影（包括影低電腦條碼貼紙）將會被扣 5% 分數
如果你公開展示相關相片或紀錄，相關科目成績更會被降級！
有關「報到易」嘅注意事項同使用方法，請參閱以下文章：
https://recurso.com.hk/column/exam-info/check-in-smart-2025/
考試期間……
宣布開考後，你必須喺答題簿、試題答題簿、多項選擇題答題紙、補充答題紙以及方格紙嘅指定位置貼上電腦條碼貼紙同埋填寫考生編號。（多項選擇題答題紙需要額外填寫姓名以及簽署）
DSE 考試物資下載：
https://recurso.com.hk/dse-materials/
宣布「停止作答」後……
宣布「停止作答」之後，你唔可以再張貼個人電腦條碼貼紙或填寫考生編號。
監考員會分開收集答卷同電腦條碼紙，你唔可以將剩餘嘅電腦條碼貼紙帶離試場。
溫馨提示
如果你將電腦條碼貼紙帶離試場，相關科目成績會被降級！
備用電腦條碼紙
如果試場無你嘅個人電腦條碼紙（例如你去咗非指定試場應試）；甚或乎你嘅個人電腦條碼紙損毀、資料錯誤或者唔見咗，監考員會幫你準備一張備用電腦條碼紙。
屆時你只需要按照監考員指示，於開考前喺每個備用電腦條碼貼紙上面填寫你嘅考生編號同埋座位編號！
如果電腦條碼紙唔夠用……
萬一你真係加咗好多張補充答題紙，電腦條碼貼紙唔夠用嘅話，試場係唔會為你安排額外嘅電腦條碼紙！
到時你只需要喺原本用嚟張貼電腦條碼貼紙嘅指定位置上面寫翻自己嘅考生編號就得！（唔會扣分，亦唔使喺試後填寫任何報告書）
溫馨提示
你必須喺試場主任宣布開考後，先可以開始貼電腦條碼貼紙／填寫考生編號！
但你可以喺等緊開考期間，幫每張電腦條碼貼紙搣定一個角落，咁開考後就可以用最快嘅速度貼晒所有電腦條碼貼紙！
宣布停止作答之後，如果你發現自己未喺答題簿／試題答題簿封面／多項選擇題答題紙張貼電腦條碼貼紙／填寫考生編號，你可以喺監考員監督下補貼／補填。
千祈唔好喺宣布「停止作答」後自行補貼電腦條碼貼紙／補填考生編號，否則會被扣分！
英文科試卷一／三嘅 Part B，你只需要喺你有選答嘅試題答題簿貼上電腦條碼貼紙（B1／B2 其中一本），唔需要理會冇選答到嘅試題答題簿。
設計與應用科技試卷二，如果你無作答卷二乙第四題，你唔需要喺卷二乙工作紙張貼電腦條碼貼紙。
一般而言，喺內頁答題簿漏貼電腦條碼貼紙唔會影響分數。 只要你有喺封面頁貼上電腦條碼貼紙，一律都唔會扣分！ ※ 封面頁嘅電腦條碼貼紙一定唔會漏貼，因為收卷嘅時候監考員見到嘅話，佢一定會叫你喺佢監督下補貼返！
喺答題簿／補充答題紙寫漏考生編號，或者寫錯考生編號，唔會影響分數。
資料來源：香港考試及評核局
