2025 DSE｜考 DSE 去錯試場點算好？
考試之前記得留意！
有啲學校嘅名真係非常相似，例如： 聖保祿中學 ↔ 聖保祿學校 聖保羅書院 ↔ 聖保羅男女中學 香港真光中學 ↔ 香港真光書院
所以，喺 Google Map 查交通路線嘅時候，記得 Check 清楚校名同地址係咪同準考證上嘅資訊相吻合！Google Map 有機會彈錯第二間學校俾你！
萬一真係去錯學校……
試場主任會派呢張須知俾你，等你決定係咪轉往合適嘅試場應試。
選項一：即刻衝返去啱嘅試場
如果距離開考仍然有一段時間，你可以選擇即刻衝去原本寫喺准考證上面嘅試場。
但你必須自行承擔風險，如果遲到嘅話，試場係唔會補時俾你作答！
選項二：留喺呢個試場
如果已經趕唔切，你可以選擇留返喺度作答。
監考員會派一張備用電腦條碼紙俾你。到時你只需要按照佢嘅指示，於開考前喺每個備用電腦條碼貼紙上面填寫你嘅考生編號同埋座位編號就得！
完卷之後，試場主任會安排你填寫報告書，要你講返去錯試場嘅原因、以及前往試場所使用嘅交通工具等。
有關電腦條碼貼紙嘅注意事項，請參閱以下文章：
https://recurso.com.hk/column/exam-info/barcode/
以下有幾個情況俾大家參考：
情況一：如果你個試場咁啱有你報考嘅卷別，且應考語言同你本身報考嘅應考語言相同
咁就冇任何問題，你照常答題就得。
情況二：如果你個試場咁啱有你報考嘅卷別，但應考語言同你本身報考嘅應考語言唔一樣
如果你已經開始閱讀試卷，無論份卷嘅應考語言同你本身報嘅唔同都好，你都只可以留返喺度繼續作答。
不過，你可以用返本身報考嘅語言作答。
情況三：如果個試場冇你報考嘅選修卷別／單元
如果你堅持留喺呢個試場應考，作答你本身無報考嘅卷別，你喺考試完結之後必須填寫報告書，向考評局提出更改選修單元嘅特別申請！
請留意，考評局係有機會唔接納有關嘅答卷！倘若申請最終獲得接納，你須要繳交附加費（$687）同埋科目費。
選項三：前往最就近嘅試場
如果你發現你去錯嘅試場冇你報考嘅選修卷別／單元，又或者試場冇你報考嘅語言；而你去錯嘅試場同你原本獲安排嘅試場距離相差甚遠，唔會趕得切衝過去嘅話，你可以選擇前往最就近嘅試場應考。（考試安排同第 4 頁嘅情況一樣，你會獲發備用電腦條碼紙，以及須要喺試後填寫報告書！）
相關資訊已經放喺【考評局網站－試場一覽表】度！
https://www.hkeaa.edu.hk/tc/hkdse/admin/exam_centres/exam_centres.html
溫馨提示
去錯試場唔一定有得考！
去錯試場都有得考嘅 前提係試場內仍然有額外座位同埋考試用品（例如試卷）俾你用，因此有得考並唔係必然！
去錯多過一次非指定試場會被扣分！
如果你喺同一考試年度內前往非指定試場應試超過一次，你之後嗰一科將會被扣 5% 分數！ 除非遇上突發意外（例如交通意外、遲咗太多起身）逼不得已前往非指定試場，否則你應該跟返准考證上面嘅指定試場應試！
考評局唔會幫你傳真試卷！
試場只會提供預設嘅應考語文／卷別／單元試卷，考評局唔會提供傳真唔同試卷嘅安排！
資料來源：香港考試及評核局
